"الأطفال زينة العيد": أضحى بشوش في شاتيلا برغم كل شيء
عيد الأضحى، خصوصًا في مخيّم شاتيلا، من أجمل أيّام السنة. تجدون الابتسامة العريضة على وجوه الأطفال أينما ذهبتم، الألعاب التقليديّة وجَمعة الشباب اللطيفة.
هاي قاعة الشعب، هي الأكثر شعبيّة، وبتجمع بالعيد ألعابه التقليديّة وهني المراجيح والدويخة. شابّ من المنطقة بيعمل هاي المراجيح بالعيد، وبيستفيد منها لما بيتجمّعوا الأطفال.
هاي الصورة في حي الصدمة اللي بنعتبره عاصمة شاتيلا. التكتك الكهربائي هو "الترند" الجديد لألعاب العيد، وصاحب التكتك بياخذ ألفين ليرة عالراكب وبيعملّه جولة بالمخيم مع أغاني وهتافات مثل "يا ولاد الكوكو يلعن أبوكو".
الدويخة لعبة جدًا مميزة بيحبوها البنات، وبيلعبوها عشان يدُوروا ويدردشوا مع بعض.
بارودة الخرز هي واحدة من ألعاب العيد المفضلة. بيتقسّموا الأولاد إلى مجموعات وبيبلشوا بلعبة "مراد علمدار"، وأظرف المواقف بتصير في وسط الاشتباك لمّا يوقفوا الكبار على جنب الطريق وبنسمع الأولاد بيقولوا: "امرق امرق ما رح طخك".
العيدية من أهمّ أركان العيد! كمان منشوف بالصورة العيدية بالدولار، الأولاد ما بيقبلوا ياخدوا باللبناني.
أطفال بيستنّوا دورهم بفارغ الصبر حتى يستمتعوا بألعاب العيد بتياب جديدة وأنيقة.
الحلاقة هي من المشاهد الأساسية بالعيد، بس هالمرة مش بالمحل بل بالشارع بسبب انقطاع الكهرباء والشوب.
الأطفال زينة العيد – العمر المستهدف والعنصر الأساسي، بيشتروا تياب جديدة وبينزلوا عالشارع بكّير ليلعبوا.
المرجوحة، رفيقة الطفولة واللعبة الرسمية للبنات، بتنحطّ بشكل منتظم كل عيد، ودايمًا بتنجح برسم الابتسامات على وجوه الاطفال.